Eyehield 21 " المقنع 21"

التدوينه من كتابة:

MissHiruma@

~~~~~~~~~~~~~~~~~~~~~~~~~~~~~~~

 باتكلم اليوم عن أجمل مانجا من نوع الرياضه بالنسبه لي♥

 وكانت اهم سبب والدافع لي لقراءة المانجا ,

بدايتي مع Eyshield21 كانت لما كنت ثالث ثانوي عام 2008

واتذكرها اختبارات الوزارة وحاله , ومن دافع الترفيه عن النفس توأمتي حمّلت "أنمي جديد" فيه صورة واحد مبتسم واسنانه باينه, قالت بنفسه شكله كوميدي خن نوسع صدورنا فيه XD

جينا شغلنا اول حلقه وعند اول ظهور لـ"هيروما" 

Doki Doki♥ ♥

حبيت الانمي واعجبت بالنوع الرياضي بسببه

حبيت اتعلم عن كرة القدم الامريكيه وعالمه الجذاب

للاسف المترجم ما كمل الترجمه ووقف بالحلقه الثانيه وراح املي معه اني اكمله لان انجليزيتي كانت سيئه جدا بذاك الوقت =_=

بدات حياتي الجامعيه, مرت سنه وبسبب كورسات الجامعه المكثفه باللغه الانجليزيه, اتحسنت لغتي بشكل ملحوظ *-*

اتذكرت حبي الاول وقلت لازم اكلمه اقراه واشوفه اي شي اهم شي اعرف وش صار

بحثت عنه لقيت الانمي, بدات اتفرج لكن كمبتدئه بالانجلش ماقدرت اتابع بتركيز فوقفته عند حلقه 15 او 20 وحوّلت على المانجا

وهي اللي اشبعت هوسي بالانمي♥

☆.。.:*・°☆.。.:*・°☆.。.:*・°☆.。.:*・°☆

 

الاسم :

Eyeshield 21, المقنع 21, アイシールド 21

تأليف:

Inegaka Riichiru

رسم:

Murata Yusuke

عدد الفصول:

333 فصل

عدد المجلدات:

37 مجلد

النوع:

Sport, Shounen, Comedy, Drama

الحاله:

مكتمله

الجوائز:

افضل 10مانجات للقرن 21

اخذت المركز السابع,

افضل 100 مانجا شونن, اخذت المركز 20

القصه:

"كوباياكاوا سينا" فتاً خجول –أقرب للجبان من الخجولXD- قد بدأ المرحلة الثانويه بثانوية ديمون مع صديقة طفولته اللي تكبره بسنه "أنيزاكي ماموري" ,

عند ذهابه للتاكد من قبوله حصل له فخ طريف من شاب نحيف الجسد اشقر الشعر ذو منظر يوحي بالشر والمدعو "هيروما يويتشي"  جعله يتورط معه ومع تابعه السمين "كوريتا ريوكان"  في نادي "كرة القدم الامريكيه",الذي كان يضم عضوين فقط "هيروما, كوريتا " وأُجبر على اخفاء وجهه بقناع ثبت على الخوذه واعطي الرقم 21. وبدات حياة سينا بهذا العالم وهذه الرياضه وحياته مع فريقه ومنافسيه احلامه طموحاته.

رأيي الشخصي:

XDطبعا بما ان هالمانجا عشقي فتحملوا هذرتي 

زي ما قلت فوق, من اول حلقه احببته *-*,

بالبدايه ما عجبتني الرياضه," وش كرة قدم امريكيه وخرابيط

عنفيه الرياضه ذي ومالها فايده ومالي خلق افهم قواعدها!"

مع تقدم الاحداث والفصول وشرح قواعد الرياضه تبدا شوي شوي تفهم الوضع وتمشي مع مسار اللعبه.

-المؤلف رهيب ! افكاره جميله يمكن الاطار الرياضي دايما واحد

فريق وهمه يفوز بالبطوله, لكن الجمال والابداع بشخصياته واحداثه

وكوميديته العفويه اللي مو متكلفه!

-الرسام له مؤلفات غيرها, رسم القصه بالبدايه متوسط لكن بعد 50 فصل 

تقريبا يتغير الرسم الى رسم جذاب , 

اعاد تصميم الشخصيات بشكل اجمل من ماكانت عليه بالبدايه,

خلفيات الصفحه, طريقة وضع المؤثرات اللقطات جدا جميله

 

-الفرق متنوعه وكثيره !

فريق ياكوزا, فرسان, روك اند رول, ديناصورات, فراعنه, رعات بقر, حوريات... وغيره

-الرياضه يبغالها تكتيك وذكاء مو بس رمي كوره وجري وناس تطب فوق بعض

الرياضه اجمل من كذا بكثير*-*

اعتبرها رياضة جماعيه بحق وليست رياضة رجل واحد

   

 

الشخصيات:

فريق خفافيش ديمون الشريره

"Deimon Devil Bats"

"كوباياكاوا سينا"

اخذ مركز العداء بالفريق واعطي الرقم 21

للامانه بالبدايه ما حبيت سينا, جبنه وهربه وضعفه نرفزني لكن مع تقدم الاحداث يبدا يحب اللعبه, يبدا يتكون طموحه, الرياضه صقلت شخصيته شيئا فشيئا

بدا يطمح للمنافسه والقوه وللكريسماس بول

بدات احبه وصار من ابطال المانجا المميزين

"هيروما يويتشي"

كياااااااااااااه♥♥♥<<< اعذروني XD

احم...الظهير الربعي لفريق خفافيش ديمون الشريره  

صاحب الرقم 1

القائد القادم من الجحيم,المقامر الداهيه العبقري الشرير

ماضيه الغامض وعشقه للعبه ابهرني

طموووح بشكل عجيب" 1% لاتعني الخساره مالم تكن 0"

يشيل معه دائما مذكره صغيره سوداء كاتب فيها ابشع اسرار الناس حوله

حتى مدير المدرسه وعمدة ديمون وصل لهم

اللي يبيه بيحصله عاجلا او اجلا XD

هيروما مع انه يفتقر للقوه الجسديه الا انه اثبت وجودة على صعيد اللعبه معروف بعبقريته وتكتيكاه اللي تخلي الخصم يرتبك.

"كوريتا ريوكان"

رجل الخط, مدافع حمل الرقم77

الفتى الضخم نائب هيروما, الكواته والطيبه تنكب كب من هالشخصيه

معروف بحماسه وتفاؤله وقلبه الكبير

مهووس بالكريسماس بول زي هوس هيروما بس طبعا نقيضه من ناحية الشرXD

 XD

 

" رايمون تارو"

الملقب بمونتا ورقم قميصه 80  يلعب بمركز ملتقط الكرات

بالبدايه الرسم مصوره زي القرد بالضبط بس مع تقدم الاحداث وتغير الرسم صار اقرب للبشر , صديق سينا العزيز ومعجب بـ"ماموري"

"انيزاكي ماموري"

صديقة طفولة سينا, عضوه بمجلس الطلبه

النقيض من هيروما, تلقب بالملاك, اخذت على نفسه عاتق حماية سينا واعضاء الفريق من هيروما وتنمره, بالبدايه وجوده مزعج صراحه بس مع تقدم الاحداث بدات تجد نفسها معهم وحبت الرياضه مثلهم

تفهم هيروما والوحيده اللي تقدر تعارضه, هيروما يعتمد عليها كليا بس مايبين  

XD

بقية اللاعبين "الاخوه هاه" "كوموسوبي" "يوكيميتسو"

"تاكي" "ايشيمورا""كيريبيروس" "موساشي" والبقيه ♥ .

الشخصيات جدا كثيره, وهذا احد اهم اسباب حبي لها♥♥

تلاقون تنوع كبييير تنوع شخصيات اللاعبين ونقاط قوتهم مخلي المباراة ماتمشي على رتم واحد

مره العامل الاساسي للفوز الذكاء هنا يبرز هيروما- هو يبرز بكل مباراةاصلاXD-

مره الالتقاط, مره خط الدفاع, السرعه

وهذا اللي يحسس بالتجديد, حتى شعارات الفرق تتنافس بينها XD

بالنهايه اقول المانجا رائــــــعه ♥♥♥

 استمتعت فيها وتاثرت وضحكت *-*

تكلم الكثير من النقاد عنها من تقوالهم: ان الموضوع عادي ومحور القصه مستلهك

لكن الاسلوب اللي اتبع في تاليفه واحداثه انتجت تحفه غير متوقعه!"

"كان لها السبب الكبير باهتمام الكثير من اليابانيين لممارسة اللعبه"

ادري ان نوعها رياضي وكثير بيقول ماراح نتحمس الا بصوت وحركات ...الخ

لا تخلي هالفكره تبعدك عن التجربه, المانجا بكل تاكيد تاخذ 10\10

اتنمى انكم جد تجربونها وتيعشون الحماس والمتعه اللي عشتها مع 333 فصل من الجمال *-*

♥♥♥